Bu-lat-lat (boo-lat-lat) verb: to search, probe, investigate, inquire; to unearth facts Volume 2, Number 44 December 8 - 14, 2002 Quezon City, Philippines |
Tula (Poem) Ikaw Kasama, at ang Malayang Bukas ay Iisa Sinag
Diwa Tunay na dakila ang kaisipang sa ati’y gumagabay Diwang mapagpalaya sa atin at sa masa Kaisipang siyang dahilan kung bakit ako’y narito Habang pinagmamasdan ang iba pang mga kasama Sa kanilang masigasig na pagkilos…
Kaytulin ng panahon, Kaylan lamang ba nang sinabi mo… “Sige, kasama, hanggang sa muling pagkikita” Ngayon, heto uli tayo Katulad ng mga alon sa dagat na dumadaluyong At ihinahalik ang pagsikhay sa pampang …unos ma’y dumatal
Ikaw, ang mga kasama, ang masa at ang pakikibaka, Mga pinakamakabuluhang bagay Na nangyari sa buhay na ito— ‘Pagkat doon ko napagtantong Walang saysay ang mabuhay para sa sarili at iilan…
Batid kong di pa sapat ang karanasan na aking natamo Kaylangan pa ng pagpapanday ng panahon Upang maging isang tulad mo. Kasama, sa ating pagsikhay sa pinapangarap nating lipunan Ikampay ang ating mga bagwis Tulad ng haring ibon sa himpapawid—
Patuloy na isulong ang pinakaabanteng kaisipan! Sumandig at magtiwala sa masa Bakahin ang sistemang mapanupil at mapagsamantala Na siyang nagpapahirap sa sambayanan Tungo sa pagkakamit ng di magmamaliw na liwanag… Liwanag ng malayang bukas!
(Tula ito ng isang estudyanteng kamakailan lamang nagpasyang buong panahong maging organisador pagkatapos maranasan ang bulok na sistema ng edukasyon/pagtuturo gayundin pagkatapos maranasan ang ilang mga pandarahas ng mga pulis sa mga mobilisasyon) Reposted by Bulatlat.com We want to know what you think of this article.
|