This story was taken from Bulatlat, the Philippines's alternative weekly newsmagazine (www.bulatlat.com, www.bulatlat.net, www.bulatlat.org).
Vol. VI, No. 3, February 19-25, 2006

TULA (POETRY)

Sugal ng Buhay

NI PAUL PRUEL

Inilathala ng Bulatlat

Unang linggo ng Pebrero

Umaga ng Sabado

Sa Ultra'y nagkagulo

Mga sigaw, umalingawngaw

Mula sa libo-libong tao.

Sila'y nag-uunahan at nagtutulakan

Nagpupumilit na makapasok sa pintuan

Nguni't sadyang mailap ang kapalaran

Bumulagta ang karamihan

Inapakan, hanggang sila'y bawian ng buhay.

Ang dating masayang umaga

Ay nabalutan ng kalungkutan

Iba't ibang damdamin ay nailarawan

Katulad ng pagkamuhi, pagkasuklam at sisihan

Sa nangyaring trahedya na kailanma’y di inasahan.

Ang Ultra'y naging libingan

Ng mga nasawing mamamayan

Na naghangad ng magandang kinabukasan

Isinugal, buhay nila't kapalaran

Na nagwakas sa kandungan ni Kamatayan.

Iyon ay karanasan na di basta makakalimutan

Ng mga naiwang pamilya't buong sambayanan

Pati ang Santo Papa sa Roma'y natigilan

Nabigla sa nasaksihang pangyayari

At nag-alay ng maikling dasal para sa mga nasawi.

Kailanman di maitatago ang katotohanan

Na ang kawalan at kahirapan ang dahilan

Kaya libu-libong tao'y sa Ultra'y nagdagsaan

Nagbakasali't isinugal ang kapalaran

Sakaling suwertihin, gaganda ang kinabukasan.

Noon malimit kong marinig ito: "Heto isang kahig, isang tuka."

Ngayon iba na: "Heto sampung kahig, walang matuka."

Ang trahedyang kumitil ng maraming buhay

Sana magsilbing panawagan sa pamahalaan

Na masolusyunan ang ugat ng lahat ng ito: ang kahirapan!

The author has been working as an account analyst in Riyadh, Saudi Arabia for nine years.

Bulatlat

© 2006 Bulatlat ■  Alipato Publications

Permission is granted to reprint or redistribute this article, provided its author/s and Bulatlat are properly credited and notified.