Jovi, Kung
Paano Ka Nila Pinaghandaan
NI AXEL PINPIN
Inilathala ng Bulatlat
Planado at tiyak nang simulan nilang
hukayin
ang libingan nilang magiging mga martir.
Rigodon na nga sila at di magkamayaw
upang ipagyabang sa ‘yo, Jovi, ang di nila
pag-ayaw
sa handog mong kamatayang walang hanggan.
At inihahanda rin nila ang kanilang mga
dibdib
habang inaantay ang kalabog ng kamaong
lintik.
Ang kanilang tadyang ay sadyang matitibay
din,
nang ang tadyak ng bota ay di indahin.
Sinangkalan nila ang kanilang leeg at
batok. Pinatatag.
Ihampas man ang dos-por-dos ay di
matitinag.
Pati ang kanilang mga lulod, ang mga tuhod
–
aldabahin man ng lanobo at kahit pa tuod.
Lupig mo nga yata sila ngayon, Jovi.
Pero maging ang daliri nila’t kuko ay
manhid
atakihin man ng martilyo at plais.
Rebulto na sa tigas ang kanilang mga bayag
anumang boltahe ng kuryente, wala nang
kiliti’t sindak.
Nililinaw nila ang kanilang mga isip,
pinagliliwanag
para sa anumang pusikit na alok ng
pagbaliktad.
Ang kanilang mga dila ay matwid, di
umuurong
gaano pa mang tukso, ulok ng pagsusuplong.
Bibiguin ka nila, Jovi. Bibiguin!
Anong tamis ng timpla ng kanilang
kasinungalingan.
Yao’y pantapat sa mapait na balang
inasukalan.
Ay! Ang ala-ala ng panginoong iyong
pinaglingkuran
Renda sa kanilang takot, nagmamaliit sa
imbing pagpaslang.
Iyo na, Jovi, ang hukay! Kanila na ang
saya!
Nanaig na ang kanilang sigaw sa iyong
singhal.
Kawasa’y muling ililiyad ang kanilang
dibdib
Alab ng paniningil ang doo’y nasasabik
Tagdang suhay sa kanilang leeg, batok at
tadyang
ang muling pagpipiging sa pagbangon,
paglaban.
Ramdam na nila ang pagsikad ng kanilang
binti
Umang na ang daliri, buo ang bayag, handa
ang sarili
Nangaghahanap. Itak man o baril para
maghiganti
Gaano na lamang ang alok mong kamatayan,
Jovi?
Ang diwa at dila pa ba nila ang iyong
maisadlak?
Ngising-aso ka man sa TV, kanila ang
huling halakhak!
10 Agosto 2006
Camp Vicente Lim
Inilathala ng Bulatlat
BACK TO
TOP ■
PRINTER-FRIENDLY VERSION ■
COMMENT
© 2006 Bulatlat
■
Alipato Media Center
Permission is granted to reprint or redistribute this article, provided
its author/s and Bulatlat are properly credited and notified.