DAGLI SA KRISIS
Milenyo
Ang bagyong Milenyo ay
walang countdown. Bigla na lamang itong dumating, biglang umalis. Nag-iwan
ng malawakang pinsala. Tinanong ni Gloria Macapagal Arroyo sa kanyang
sekretaryo, kung hindi raw ba mapapabilis ang pagbabalik ng kuryente sa
Luzon. Kung iisipin, walang tiyak na itinatanong at isinasagot ang
pamahalaan sa anumang bagay na ipinaparating sa kanya.
NI ROLAND TOLENTINO
Bulatlat
Hindi ba’t ito ay
tumutukoy sa isang libong taon? Nakakadalawang milenyo na tayo, at nasa
loob na nga tayo ng bukana ng ikatlong milenyo. Dalawang milenyo ng uring
tunggalian kung iisipin ng mga marxista, ng patriyarkal na pang-aapi ng
mga feminista, ng produksyon ng pribilehiyong kaalaman ng kanluran ng mga
postkolonyalista, ng labis na pag-aaksaya at pambubusabos sa kapaligiran
ng mga environmentalista.
Pero mas simple ang
sinasabi ng bagyong Milenyo. Lumalabas na hindi random at aksidente ang
pagkapangalan nitong bagyo na wumafung sa Luzon, lalo na sa Manila.
Kung ang milenyo ang
pagsisimula ng muling pagbilang ng edad at siglo, ang bagyo ay nagsasaad
rin ng pagpatlang ng buhay, tungo sa pagsasara at pagbubukas. Bigla
tayong napatanga isang Huwebes na hapon na walang pagdausdos ang hangin,
at mula sa bintana natin, nagliparan ang mga dahon, sanga at basura.
Dumagundong ang hangin, bumulagta ang mga puno, at nagpasukan ang mga
tubig sa dingding, bubong at sahig.
Sabado na at wala pa
ring kuryente sa kabuuang Manila. Sa Bikol nga ay walang kuryente ang
buong rehiyon. Ang mga puno sa New Manila at Diliman ay napigtas at
nakabalandra sa kalsada. Tanging ang monumento ni Bonifacio na may hawak
ng tabak ang nanatili sa harap ng Vinzon’s Hall sa U.P.
Ano ang isinasara at
binubuksan ni Milenyo?
Ang paglikha ng hindi
mapapantayang peligrong dulot ng bagyo ang naglilibing sa ngalan nito.
Hindi na ulit gagamitin ang pangalang Milenyo, tulad ng iba pang pangalang
nakapaghasik ng napakalawak na peligro sa bansa.
Tulad ng mga
sentenaryong pagdiriwang ng kalayaan ng bansa o maging ang taunang
pagbibilang ng kung ilang araw na lang bago magpasko, ang mas mahalaga ay
ang countdown, hindi ang aktwal na araw ng selebrasyon at paggunita.
Pero ang bagyong
Milenyo ay walang countdown. Bigla na lamang itong dumating, biglang
umalis. Nag-iwan ng malawakang pinsala. Tinanong ni Gloria Macapagal
Arroyo sa kanyang sekretaryo, kung hindi raw ba mapapabilis ang pagbabalik
ng kuryente sa Luzon. Walang tiyak na sagot ang sekretaryo.
Kung iisipin, walang
tiyak na itinatanong at isinasagot ang pamahalaan sa anumang bagay na
ipinaparating sa kanya. Lalo na kung siya ay may kasalanan, na sa
pambansang pamamalakad ay paratihang may accountability ito. Magtatag ito
ng komisyon para mag-imbestiga politikal na pagpaslang nang maipit ito ng
mga organisasyong karapatang pantao at dayuhang pamahalaan. Sa kasaysayan
ng mga komisyong inatasang mag-imbestiga, walang kinahantungan ang mga ito
maliban sa papatse-patseng pagtukoy ng maysala at pwersang nagdulot nito.
Kung naghanda lamang
tayo sa panahon ng sakuna, sakit, peligro, aksidente, disaster at
paghihikahos… Sino ang lubos na dapat maghanda, lalo na kung ito ang
pamahalaan ng bansang may pinakamaraming bilang ng natural na disaster sa
buong mundo? Bakit parating kapos, mas matagal ang hagupit, mas malawak
ang perwisyong dulot kada may malaking disaster na nangyayari?
Humilata tayo sa
ating mga kama, tumitig sa kadiliman dulot ng blackout na bumabalot sa
ating kapaligiran, at mag-isip habang nagpapaypay ng init, kung ano pa ang
pwede nilang gawin para mas maging miserable ang ating pang-araw-araw na
buhay? Bulatlat
------------------------------
(Ang maikling kolum
na ito ay nasa pormang dagli, na ginamit sa mga diyaryo sa panahon ng
kolonyalismo ng US sa Pilipinas. Ang moda ng dagli ay maaaring dedikasyon,
malasanaysay o malakatha. Maaari itong magkaroon ng lamang pulitikal na
siyang magiging palagiang laman ng kolum na ito.)
BACK TO
TOP ■
PRINTER-FRIENDLY VERSION ■
COMMENT
© 2006 Bulatlat
■
Alipato Media Center
Permission is granted to reprint or redistribute this article, provided
its author/s and Bulatlat are properly credited and notified.