DAGLI SA KRISIS
Pambansang Isda
Ano ang turing natin
sa mga simbolong ipinagbubunyi ng bansa? Sa kaso ng bangus sa kasalukuyan,
ito ay dine-debone. Mahikal na trinatransforma ang mabilis na lumalangoy
na pilak na isda tungo sa isdang biniyak sa kalahati, ibinabad sa suka at
bawang, at walah! wala pang tinik.
NI ROLAND TOLENTINO
Bulatlat
Ano ang kahulugan kapag
sinasabing pambansang simbolo?
Pambansang dahon? Anahaw.
Pambansang prutas? Mangga.
Pambansang hayop? Kalabaw.
Pambansang isda? Bangus.
Nagpupugay ba tayo sa mga ito gaya nang pagpupugay ng mamamayan at bansa
sa paanan ng dambana ni Jose Rizal, ang pambansang bayani? Ano ang turing
natin sa mga simbolong ipinagbubunyi ng bansa?
Sa
kaso ng bangus sa kasalukuyan, ito ay dine-debone. Mahikal na
trinatransforma ang mabilis na lumalangoy na pilak na isda tungo sa isdang
biniyak sa kalahati, ibinabad sa suka at bawang, at walah! wala pang tinik.
Si
Princess Ballesteros ang pinakamabilis na magtanggal ng tinik ng bangus.
Simula pa nang siya ay nasa Grade IV, ngayon sa edad na 17 ay
nakakatanggal siya ng lima hanggang pitong bangus kada minuto!
Nagtratrabaho si Princess kay Aling Fe na nakakapagtanggal ng tinik ng
bangus galing sa 35 na banyera. Kay Aling Alma napupunta ang mga tinik.
Pinsan kasi ng asawa ni Aling Fe si Aling Alma. Nakasalampak nang apat na
oras sa munting bangko, pitong taon na niyang kinakayod ng kutsara ang
nasamang laman sa tinik. Masakit man ang kanyang braso, likod at balikat,
nakakaipon pa rin siya ng limang kilong laman na ibinebenta niya ng P40
bawat kilo. Ito ang sumusuporta sa lima niyang anak, apat ay nagpapaaral
pa.
Sa
syudad ng Dagupan, ipinagdiriwang nang husto ang pambansang isda. Taunang
ipinagbubunyi tuwing Abril ang Bangus Festival. Sa katunayan, sa
nakaraang “Kalutan ed Dagupan,” ang malaking barbeque party, ang syudad
ang nakalampas sa world record ng Peru nang mag-ihaw ito ng 24,000 bangus
na umabot sa 1,007 metro at mapasok sa Guinness Book of World Records.
Ang record ng Peru ay 613 metro lamang.
Sa
syudad ng Dagupan, lahat ay may katumbas na lutong bangus: lumpiang
bangus, bangus belly, bangus sisig, tinapang bangus, daing na bangus,
bangus longganisa, chicarong bangus, at bangus tapa, halimbawa. Kulang na
lang ay may halayang bangus, halohalong bangus, leche flang bangus, at iba
pa.
Matalas ang pang-amoy ng dayuhan sa pagdambana ng mamamayan at syudad ng
Dagupan sa pambansang isda. Isinama ang syudad sa 33 inilista ng World
Bank sa City Development Strategies. Ang mga proyektong inihanay para sa
Dagupan ay flood control mitigating project, bangus processing plant, at
pagtayo ng tatlong palapag na palengke para sentralisadong lugar ng
pagbenta ng mga produkto mula sa planta.
Para
itayo ang processing plant, kailangang i-demolish ang Bagong Barrio, ang
lugar ng CBN Bonuan Boneless Bangus, ang negosyong itinatag noon pang 1994
mula sa pawis at dugo ni Aling Fe, at pinagkukunan ng kabuhayan ni Aling
Alma.
Malapit
nang dumating ang hantungan at bawat araw ay lalong kinakabahan ang mga
maliliit na negosyanteng, tulad ni Aling Alma, at iba pang indibidwal na
pinagkukunan ng negosyo mula rito, tulad ni Aling Alma. Kapag natatag ang
planta ng bangus, baka wala nang mapagkunang libreng tinik si Aling Alma.
Habang tsinatsani ni Princess ang natitirang hiblang tinik at kinakayod ng
kutsara ni Aling Alma ang huling nakakapit na laman, may saglit na sandali
na bigla na lamang silang mapapatigil, mapapabuntung-hininga nang tila
hindi nila namamalayan na dahilan. Sa ngayon, habang kumikirot pa ang
likod ni Aling Alma at malinaw pa ang mga mata ni Princess, bigla silang
babalik sa gawain nang tila walang patid sa nangyaring iglap. Ni hindi na
rin maalaala na ang kanilang maingat na trinatrabaho ay isang simbolo ng
pagbubunyi sa bansa. Bulatlat
------------------------------
(Ang maikling
kolum na ito ay nasa pormang dagli, na ginamit sa mga diyaryo sa panahon
ng kolonyalismo ng US sa Pilipinas. Ang moda ng dagli ay maaaring
dedikasyon, malasanaysay o malakatha. Maaari itong magkaroon ng lamang
pulitikal na siyang magiging palagiang laman ng kolum na ito.)
BACK TO
TOP ■
PRINTER-FRIENDLY VERSION ■
COMMENT
© 2006 Bulatlat
■
Alipato Media Center
Permission is granted to reprint or redistribute this article, provided
its author/s and Bulatlat are properly credited and notified.