TULA (POETRY)

Christmas Party

NI MARK ANGELES

Inilathala ng Bulatlat

Nanalo si Tatay ng oven toaster sa pa-raffle.

Pag-uwi, ginising niya kami ni Obet

na bumangon, matang-manok, sa folding bed.

Sa lamesa, sa tabi ng isang nakaplastik na pansit,

nakaupo ang bago naming toaster,

nangingislap kay nanay na nananalamin.

May nanalo ng TV at electric fan, sabi ni Tatay.

Sana nakuha mo na lang ang washing machine,

panghihinayang ni Nanay, na tinimbang ang premyo

sa mga kamay niyang magagaspang.

Inilathala ng Bulatlat

© 2006 Bulatlat ■  Alipato Media Center

Permission is granted to reprint or redistribute this article, provided its author/s and Bulatlat are properly credited and notified.