Paano Kung Wala nang Magandang Babae sa Filipinas?

NI RAUL FUNILAS
Inilathala ng Bulatlat

Ang kagandaha’y ihinahaplos lamang sa mga babae.
Paano kaya sisters kung wala nang magandang babae
Dito sa atin? May magagawa ba ang isang babaing
Ipinangalandakan sa lahat na siya’y magandang  babae?

Binabae niyang hinimas ang matapang na bilang
Samantalang yupyop sa puya ang siyap na di mabilang,
Sumasalasa ng siga ang pinakawalang 1017 at ibang bilang;
At ang likaw na bakal ay pinagkambal ang brasong bilang
At tinatakang kaaway na lihim.(Sila kasi ang lumalaban.)
Ibinubungkalo ang bibig ng pahinang tunay ang paglaban
Sa sinasabing malakas na republikang ang nilalabanan
Ay ang masang walang mahulmang armas upang lumaban.

Paano na tayo kung wala nang magandang babae sa Filipinas?
Tayo ba’y magtatabon ng lupa upang kung magliyab ang Filipinas
Ay hindi mababahiran ang basal nating prisipyo? Ay! Filipinas,
Kailan iimbulog at mababasa sa buong mundong maganda ang Filipinas?

10 March 2006
UP Diliman

Bulatlat

© 2006 Bulatlat ■  Alipato Publications

Permission is granted to reprint or redistribute this article, provided its author/s and Bulatlat are properly credited and notified.