Si Hesukristo at ang Bayan Ko
(Semana Santa Haiku)

NI RAUL FUNILAS
Inilathala ng Bulatlat

Noon:
Humihilahod
Ang katawan ni Hesus
Nang pasani’y krus.

Ngayon:
Humihilahod
Itong kay Juan de la Cruz
Na bayang dahop.

Noon:
Lupang Golgota’y
Doon Ka pinadipa
Ng palamara.

Ngayon:
Taga-Pampanga
Ang sanhi ng pagdipa
Ko sa kalsada.

Noon:
Simeon Sirenyo’y
Humalili kay Kristong
Sakromadero.

Ngayon:
Gloriang Dorobo’y
Kuha kay Ejercito
Ang gintong trono.

Noon:
May pahintulot
Si Husep, Nikodemus
Ilibing ang Dios.

Ngayon:
Moog na puntod
Sa masang iniirog
Ang Gloryang punggok.

Noon:
Hingi ay tawad
Kay Kristo nitong Dimas
Tulad ni Hestas.

Ngayon:
Nakaw ay limpak
Nitong unano/pandak
Sa kabang butas.

Noon:
“Recumbentibus
Undecin discipulos
Apparuit Jesus.”

Ngayon:
Kelan ang panaw
Ng nagnakaw sa bayang
Mga kongresman?

Noon:
Si Sto. Tomas
Ang dumama ng sugat
Ni Kristong Anak.

Ngayon:
Ang baya’y sugat-
Sugatan sa pagsaksak
Ng talipandas.

-Marso 16, 2006

Bulatlat

© 2006 Bulatlat ■  Alipato Publications

Permission is granted to reprint or redistribute this article, provided its author/s and Bulatlat are properly credited and notified.