Kontinyuwing Kraym

NI RICHARD R. GAPPI
Inilathala ng Bulatlat

Mangatwiran tayo nang konti:

Sabi nila,

kontinyuwing kraym daw ang rebelyon.

Kaya kahit walang warrant of arrest,

halimbawa,

dinampot nila ang isang kongresman ng bayan

na namundok umano noong nakaupo pa ang diktador.

Ganundin ang gusto nilang gawin

sa isa pang kongresman ng bayan,

na namundok din daw noong dekada nobenta

(e samantalang tagapangulo siya noon ng pambansang

samahan ng mga manunulat sa eskwelahan.)

E, yun kayang pandaraya sa halalan?

Hindi ba ito kontinyuwing kraym?

Hindi ba kontinyuwing kraym sa demokrasya

ang mamuno nang walang basbas ng balota?

Hindi ba kontinyuwing kraym sa moralidad

ang “Hello, Garci” tape na nabunyag?

Hindi ba kontinyuwing kraym sa institusyong militar

ang gamitin sila, laluna ang mga heneral, sa pulitika ng halalan at dayaan?

Ang suma total:

May rebelde ngayon

na walang ipinaglalabang paninindigan;

isang rebelde na nagkukuta sa Malacañang

na dapat nang arestuhin ng mamamayan.

Kahit walang warrant of arrest.

- Angono, Rizal

Bulatlat

Permission is granted to reprint or redistribute this article, provided its author/s and Bulatlat are properly credited and notified.