Saligutgot sa Paligid 

NI REY TAMAYO, JR.
Inilathala ng Bulatlat

May salagimsim ako na may darating
na ‘di kawasang lungkot. Ang ‘di mabilang na langkay

ng mga balawis na nagtatangka sa aking
abang buhay. Na nais akong pasakitan

at bigyan ng tanikala. Ang mga tandos na lagi na lamang
nakaumang. Balikuko nilang gawi na hindi humuhupa.

Kung paanong ang Etiope ay di makapagbabago
ng kanyang anyo. Ganun din ang sangganong

sapalang magbago. Ako’y waring lugpo na
sa mga aglahi nila. Ngunit pinipigilan ko pa rin

ang lumuha. Nais yata nilang humiyaw
ang ponebre. At ang katawan ko’y ibulid sa ataol.

Sila kaya’y ngingisi at sa kalauna’y
hahalakhak: Kung ako’y kanilang maigupo? 

Inilathala ng Bulatlat

© 2007 Bulatlat ■  Alipato Publications

Permission is granted to reprint or redistribute this article, provided its author/s and Bulatlat are properly credited and notified.