Siyam, isa, labing-apat, higit pa

Members of Sinagbayan perform a skit depicting the plight of Negros farmers during the launch of Defend Negros. (Photo courtesy of Unyon ng Manggagawa sa Agrikultura)

by Bulatlat Contributors

Published on Jun 30, 2019

Last Updated on Jun 30, 2019 at 9:04 am

Ni JHIO JAN A. NAVARRO

Siyam, isa, labing-apat, higit pa sa Sagay, Kabankalan, Sta. Catalina Guihulngan, Canlaon at kung saan pa nilingkis,

kinalos ni Sauron sa bungkalan, tubuhan, tahanan sa harap ng asawa, anak, magulang–

tinadtad ng bala sa ulo, sa mata, sa ari, sa bunganga sinilaban, nilapnos, pinabay-an sa langaw, sa uod ng lupang sakahan.

Siyam, isa, labing-apat, higit pa sa Sagay, Kabankalan, Sta. Catalina Guihulngan, Canlaon at kung saan pa

ang babaylan uusal ng dasal, ritwal tatalima ang mga nuno’t diwata magngangalit, bubulwak ang Kanlaon lulunurin ang ningas ng Mordor sisingilin, isusumpa si Sauron:

Habang inaawit ang Ili-ili sa sanggol na pinagkaitan ng ama habang isinasayaw ang Ohoy ng inang inulila ng bala

lahat ng tansong inukit sa sinapupunan ng lupa raratrat, babaon, tatarak sa laman habang ang apoy na hinango sa bulkan ibinubuhos, aagos, lalapnos sa aninong sakim

bilang kabayaran sa siniil, kinitil na siyam, isa, labing-apat, higit pa sa Sagay, Kabankalan, Sta. Catalina Guihulngan, Canlaon at kung saan pa.