Kaibigan II

Ni MONICO ATIENZA
Departmento ng Filipino at Panitikang Pilipino
University of the Philippines, Diliman, Quezon City

Pagtula'y pagdama, pagwari, pag-isip;
Pagbasa’t pagbigkas ng loob at gilid,
tinipong salitang sinulat ding nais...
laging may pagpili't iwi ang pag-ibig,
at kung may pagyapos, pag-igkas ding pilit.

Pangusap nga ito, walang pagdududa
at tiyakang sabi ng isip at dama...
di nga paghahabi ng mga pantasya;
tumatanaw ito mula sa tuntungan
ng mundo't lipunan ng tula't pag-alam,
naghuhumindig ngang pagtuklas ng paham,
na kung umaawit tiyakan ang laman.

Pagtula'y maganda kung laging masinop.
Pinagsulsing dama at isip sa mundo
ng mga payaso't mga pilosopo,
umiibig manding sumpa ng pagbago.
Pangarap panimdim...nililikha'y tao.

We want to know what you think of this poem.