TULA (POETRY)

Atse Glue

NI GELACIO GUILLERMO
Inilathala ng Bulatlat

“It is the glue that binds”

Ang ngisi ni Atse Glue

A, glue.  May glue

Para sa butas ng bubong

Sa lamat ng tubo

Sa basag na plato

Sa bakbak na swelas

Sa bakling pustiso

Mahusay talaga ang glue

Sa halip itapon ang sira

Pwedeng gamitin uli

Salamat sa glue

Pero ibang klase

Ang hanap na pandikit

Ni Atse Glue

Mahal, unang hulog pa lang

Sambilyong piso na

At nagmamadali

Daig pa si Mr Quickie

Isa o dalawang taon

Kailangang durog na

Ang kaaway

Dugo ng mamamayan

Ang gustong glue ni Atse Glue

Superdikit siya kay Palpara’t

Mga katoto nila

“Durugin silang lahat!”

Ito ang panatang makabayan

Ni Atse Glue sa Isabela

Sa Isabela!  Sa Forest Region!

Sa pinagtipunan ng lakas

Ng panimulang pwersa

Ng PKP-BHB

Sa pinagsanayan ng mga kadre’t

Pulang mandirigma

Para magbukas ng mga bagong larangan

Sa buong bansa

Doon nakamit ang mga unang tagumpay 

At natuto sa mga kamaliang

Pinagbuwisan ng buhay ng mga martir

Ay, Isabela!  Ay, Forest Region!

Tinugis sila ng kung ilang oplan

Ni Makoy

Oplan Tag-araw, Oplan Aurora Borealis

Oplan Katatagan

Pero lahat ay nawalan ng saysay

Si Makoy ang nagbansag

Na “communist terrorists”

Ang mga rebolusyonaryo

Tinugis sila ni Tita Cory

Ng kanyang Total War

Oplan Mamamayan

Oplan Lambat-Bitag

Habang nangingisay sa gutom

Ang mga sakada 

Sa kanyang Hacienda Luisita

Nambitag din si Ramos

Habang pinapausok ang tabako

Ng globalisasyon

Panggahasa sa buong bayan

Ang Visiting Forces Agreement

Ni Erap

Ang Bantay-Laya

Ay saturation bombing

Ng war on terror

Ni Atse Glue

Ang kanyang bersyon

Ng Infinite Justice

Ng pandaigdigang kriminal

Na Bush

“Turn the Philippines

Into a howling wilderness!”

Ang pulandit ni Atse Glue

Ala-Gen. Jacob Smith noong 1901

Bundok-bundok na patay

Ang hiling niyang pamana

Sa mga Pilipino

Si Atse Glue ang embedded presidenta

Sa humvee ng imperyalismong Kano

Doon siya dikit na dikit

Nanlalagkit sa dikit

Glue

Sa SM, may nabibiling papel

Na pinahiran ng pandikit

Ilalatag sa hardin, sa kusina

Sa panahon ng mga bangaw

Nagpipista sa tae

Ng aso’t pusa

At panis na ulam sa lababo

Mabibighani sa amoy ng pandikit

Aaligid, ilalapag ang paa

Isusubsob ang nguso

Papalag, pero hindi na makaalpas

Sa dikit ng bitag

Nagpapakulo si Atse Glue ng glue

Mula sa dugo ng masa

Napakamahal na pandikit

Para sa dugong-asong presidenta

Pero yan ang pinili niyang pandikit

Hindi na makakapalag

Sa sariling bitag

Si Atse Glue

Binigkas ng makata sa Conspiracy Café nitong 20 Hunyo, sa Tugma sa Laya 3, ang ikatlong bahagi ng isang serye ng mga aktibidad ng Artists for the Removal of Gloria (ARREST Gloria) bilang ambag sa bilang ambag sa kampanya upang palayain ang tinaguriang “Tagaytay 5” na sina Axel Pinpin, Riel Custodio, Aristedes Sarmiento, Enrico Ybańez at Michael Masayes; at bilang pagtutol na rin sa mga pulitikal na pamamaslang at iba pang anyo ng terorismo ng estado

Inilathala ng Bulatlat

BACK TO TOP ■  PRINTER-FRIENDLY VERSION  ■   COMMENT

© 2006 Bulatlat ■  Alipato Media Center

Permission is granted to reprint or redistribute this article, provided its author/s and Bulatlat are properly credited and notified.