Martial Rule
NI Rey Tamayo Jr.
Inilathala ng Bulatlat
Sa bawat paghakbang ng nag-aalangang mga
paa.
Dala-dala'y takot at pangamba sa puso na
nangyayanig,
Isipan nama'y waring dinudurog ng mapanggipit na alalahanin.
At itong mga mata ko ay natatakot nang tumingin sa paligid
Sa pagkadupilas ng paningin sa madugong pangitain,
Kaya't ang salamin ng katotohanan animo'y pinipiringan.
Matitipunong mga kamay laging ikinukumo
Dahilan sa galit na laging ipinupukol,
Dating malayang kamao ngayo'y ikinukulong
Ng mga posas at ng tanikalang mga bakal.
Isang dipang pag-asa ay hindi mo na matanaw
Sa gitna ng nahahawakang dilim at pusikit na panahon,
Kahintakutan ang idinidikdik sa bawat taong lalaban
Sa puwersa ng rehimeng at dinastiyang mga lider;
Anupa't ipapaslang ang pipiyok sa pamamahala.
Ang dating matapang at malayang tinig
At ang alingawngaw ng paghahayag ng katotohanan.
Sa EDSA man o Mendiola ngayon ay nasaan?
Dahilan ba sa takot kaya't hindi maapuhap
Ang malakihang pagpupulong ngayong dagling tinitibag,
Upang ang lakas ng puwersa hindi na makapaglayag.
Ang pamamahayag ng tinta at imprenta
Unti-unti nang sinasakal ng berdugo't maninila.
Karapatan sa pagsusulat ibayong nagdurusa
Sa piling ng mga pugante na gahaman sa kapangyarihan.
Itong pulisya at mga sundalo sunud-sunuran sa liderato
Na sa kung anong layon sa tungkuli'y ba tumutugon?
Taong baya'y kimi sa batas militar na pangulo.
Inilathala ng Bulatlat
BACK TO
TOP ■
PRINTER-FRIENDLY VERSION ■
COMMENT
© 2006 Bulatlat
■
Alipato Media Center
Permission is granted to reprint or redistribute this article, provided
its author/s and Bulatlat are properly credited and notified.
