TULA (POETRY)
Kay Grecil Galacio, 9
NI MARK ANGELES
Inilathala ng
Bulatlat
May isang Griyegong nagwika:
Ang ilog ay hindi na ang dating ilog
sa susunod na paglusong.
Ibig sabihin, ikaw ay hindi na ikaw.
Noong huli mong mapansin, Grecil,
ang iyong imaheng nasalamin
sa saloy ng ilog Simsimen,
hindi iyon ang imaheng muling tatambad
sa iyo at sa mga kasamang
nanghuhuli ng gagamba sa kakahuyan
upang ipanlaban sa damang-damang.
Sa iyong siko, lumusot ang balang
pinawalan ng 67th Infantry
Batallion.
Winasak ng ilan pa ang iyong bungo.
Ikaw ay hindi na ikaw, Grecil,
habang nahihimlay ang katawan.
Sumisiyap ang mga sisiw
sa ibabaw ng iyong kabaong
at humihingi ng katarungan.
Hindi matitinag ang aming isip.
Lalo’t saput-sapot ang bintang
ng mga bulaang galamay ng militar.
Na ikaw ay miyembro ng NPA
at may hawak kang M16
noong kayo diumano ay tambangan.
Paano nga ba tatanganan
ang ripleng halos kasintaas?
Ni hindi ka makahawak
ng dalawang galong tubig
tuwing matokang umigib.
Sa pagtalunton sa landas
kung saan ka itinimbuwang,
hahanapin namin ang bakas
ng lupang napigta ng iyong dugo.
Ikaw ay hindi na ikaw,
sa ilog na ito o kung saan man.
Ngunit may kailangang magbayad
sa kanilang kapabayaan.
At may handang magbuwis
ng kanilang sariling buhay
para sa iyong kamatayan.
Inilathala ng Bulatlat
**damang-damang – larong gagamba
BACK TO
TOP ■
PRINTER-FRIENDLY VERSION ■
COMMENT
© 2007 Bulatlat
■
Alipato Publications
Permission is granted to reprint or redistribute this article, provided
its author/s and Bulatlat are properly credited and notified.
