Poetry

Takbo Gloria Lipad!

Ni Joi Barrios  

Ang sabi ni Ate Gloria Tagumpay na naman ang demokrasya Ay naku, ang coup, agad natapos Naligaw na rebelde ay nagbalik loob Konting kuskos, nawala na ang gusot Si Gloriang Labandera, Darna ng Demokrasya!     Ngunit naku, Diyos ko! Meron kayang mababago? Kung itong pangulo, Abala sa pagtakbo! Reynang ang panunungkulan, Tila walang katapusan, Ibilad kaya natin sa araw Nang matauhan sa kanyang kabalbalan.     Takbo, Gloria, Takbo! Lipad Gloria Lipad! Ding, ang bato! Ihagis sa daraanan ni Ate Glo! Ang pangulong sakim sa kapangyarihan Matitisod ng saring kahayukan Ding, ang bato! Ipukol na kay Ate Glo! Ang pangulong ayaw tuminag sa luklukan Ay dapat daganan nitong taumbayan.

An effigy of President Macapagal-Arroyo runs away from the wrath of the people  Photo by Arkibong Bayan

Ay, Gloria Labandera y Valentina,

Ahas kang nakapulupot sa mamamayan

Lubayan na kami’t tantanan

Ang hanap lang naman namin

Ay konting katiwasayan,

Konting kaginhawahan,

konting kapayapaan.  

 

Takbo, Gloria, Takbo!

Lipad Gloria Lipad!

Takbo, lipad, palayo sa aming lahat!

Huwad na Darna ay ibabagsak!

Ng aming galit, ng aming lakas!  

Bulatlat.com

Ang tulang ito ay binasa ni Dr. Ma. Josephine Barrios sa mobilisasyon kaugnay ng huling State of the Nation Address (SONA) ni Pangulong Gloria Macapagal-Arroyo noong 28 Hulyo 2003 sa harap ng Ever Commonwealth.

Si Joi ay isang premyadong manunulat at ang bagong halal na Cultural Committee Head ng Congress of Teachers/Educators for Nationalism and Democracy, University of the Philippines chapter (CONTEND-UP). Siya rin ay associate professor ng Departamento ng Filipino at Panitikang Pilipino, Kolehiyo ng Arte at Literatura (DFPP-KAL) sa UP Diliman.

Back to top

We want to know what you think of this article.