Poetry
Bayani
ng Anak-Pawis
Ni E. San Juan, Jr.
Mabuhay ka, Ka Rolando
Olalia!
Mula rito sa bituka ng
hayop, bumabati kami sa iyo
sa umpisa ng iyong
mahabang paglalakbay—
Pinaslang ka ng mga
pasistang duwag—saan sila nagtatago?
Saan nagkukubli ang
mga alipores ng militar?
Tumambad ka’t humarap,
matapang na bayani ng masa,
sa
larangan ng pakikipagtunggali,
sagisag ng lipunang ating ipinaglalaban,
bukas ang puso sa
pag-asa’t pagmamahal,
Kasamang Rolando,
narito kami ngayon sa harap ng iyong bangkay.
Alisin ang talukbong
Tanggalin ang saplot
Hawiin ang tabing
Ibunyag ang
katotohanan
Ibilad ang sekreto ng
panghuhuthot at pagsasamantala sa manggagawa
Kahit saan man sila
magtago—sa bituka ng hayop o sa lungga’t sulok
ng Clark
Field o Subic Naval Base
matutuklasan sila:
mga pasistang
duwag, mga bayarang alipin.
Matatagpuan sila--
Masasaksihan ng masa
ang krimeng hindi mapapagbalatkayuan
ng mga
ngiti nina Cory o Cardinal Sin—
ngiting nabahiran ng dugo ng ilanlibong anakpawis
ilanlibong biktima sa
Negros, Samar, Mindanao—
Kasama mo kami, Ka
Rolando
sa prusisyong ito
sa pagburol ng bangkay
ng sistemang
mandaraya’t anong
lupit!
Oo, ikaw ang tunay na
hindi nag-iisa
sapagkat
ilanmilyong Pilipino ang kasabay mong tumatawid
tungo sa pagbabagong-buhay, taas ang noo’t
nakatitig sa araw
ng katotohanan at
katarungan, sinasalubong
ang paghihimagsik mo
ng “Mabuhay, Ka Rolando Olalia!”
[ Midweek,
4 May 1988
]
=================
Tungkol sa Awtor
Nailathala
kamakailan ng Bucknell University Press ang isang bagong libro ng mga
mapanuring sanaysay ni E. San Juan, Jr., katulong sa Philippine Forum sa
New York at tagapamahala ng Philippines Cultural Studies Center, sa
Storrs, Connecticut, USA. Ang pamagat ng libro ay Working Through the
Contradictions: From Cultural Theory to Critical Practice.
Ang nakaraang mga
akda ni San Juan, ang Beyond Postcolonial Theory (Palgrave/Macmillan), at
Racism and Cultural Studies (Duke University Press), ay lumikha ng
magsigabong kontrobersiya sa loob at labas ng akademya. Ang bagong aklat
niya ay naglalahad ng matinik na kritika ng U.S. interbensiyon sa iba’t
ibang lupalop ng daigdig na nakabalatkayo sa ideolohiya ng “globalized
neoliberalism.”
Noong 2003, siya’y
nagsilbing Fulbright professor of American Studies sa Katholieke
Universiteit Leuven sa Belgium, at visiting professor of English sa
Wesleyan University. Kamakailan, si San Juan ay naging visiting professor
of literature and cultural studies sa National Tsing Hua University at
nagpanayam sa pitong pamantasan sa Taiwan.
Noong nakaraang taon inilunsad ang dalawang libro niya sa Maynila:
Himagsik (De La Salle University Press) at Tinik sa Kaluluwa at iba pang
akda (Anvil).
Ang pagpupugay na
ito kay Ka Rolando Olalia ay kasama sa bagong kalipunan ng mga tula niya:
Sapagkat Iniibig Kita (2005) na inilathala kamakailan ng University of the
Philippines Press.
BACK TO
TOP ■
PRINTER-FRIENDLY VERSION ■
COMMENT
© 2004 Bulatlat
■
Alipato Publications
Permission is granted to reprint or redistribute this article, provided
its author/s and Bulatlat are properly credited and notified.