This story
was taken from Bulatlat, the Philippines's alternative weekly
newsmagazine (www.bulatlat.com).
Vol. VI, No. 38,
Oct.
29 - Nov. 4, 2006
TULA (POETRY)
At Nawawala Pa Rin ang Aking Kaibigan at Kasamahan
NI
PHILIP ANORICO
Inilathala ng Bulatlat
Wala tayong ibang inapuhap
kundi ang pagbawi sa inagaw na pangarap—
isang daigdigang may sikmurang hindi nakakuyom
at kinakayas ng gutom.
Hindi lingid na ‘sintayog ito ng punong higera
kung saan, sa gubat na mapanglaw,
ay iginapos ang katawan ng paglayang inaasam.
Ninais nating sumambot ng sapat
ang mga kaminerong nilulutong parang aspalto
sa katanghaliang tapat
sa halip na gawin silang taong-propaganda
para sa halalang batbat ng dayaan.
Ninais nating makahawak ng aklat
ang bawat batang kalaro
sa masisikip at maiinit na tahanang
pinagtagpi-tagping yero at plywood.
Ninais nating bunutin ang busal
na isiniksik na tulad ng basurang umaapaw
sa bunganga ng mga kakilala’t kaibigan.
At kung bakit ngayon,
maging ikaw ay amin na ring inaapuhap?
Inagaw ka rin sa amin
tulad ng ating pangarap.
At para kaming humihikbi-hikbing musmos ngayon
na nang-aamot ng kapanatagan.
Ang paghanap sa iyo at katulad
ng pangangapa sa baryang
nahulog
sa
lawa.
Habang agam-agam namin kung kailan ididiit
sa aming mga gulugod ang malamig na bakal
na hindi namin alam kung iyon din
ang bakal na idinampi sa iyo.
Kung nasaan ka man,
iyong tatandaang tinupad namin ang pangako sa iyo—
isinumbong namin ang iyong pagkawala
sa mga kaklase, guro, at kaibigan.
Hindi,
hinding-hindi malilimutan ng kasaysayan
at sandaigdigan
na si Karen Empeño ay ninakaw din sa amin,
ninakaw sa bayan,
isang kabataan,
na siyang pag-asang iniingatan.
Ipagpapatuloy namin ang pag-apuhap sa iyo
sa kung paanong hindi natin tinantanan
ang pagkawag sa gapos ng lubid.
Matutupad din ang ating pangarap—
makakawala tayo sa pagkakatali sa punong higera
at babaklasin natin ang matatalim
na ngipin ng mga nakaangil tigre.
Sila ang mga buhay-na-patay
na sumasakmal sa ating dibdib at kalooban:
walang-awa silang parurusahan
ng kasaysayan.
Totoo ito,
aking kaibigan at kasamahan.
Lintik lang ang walang ganti.
Mata lamang ang walang latay.
14 Setyembre 2006
Venus Compound
Angono, Rizal
Ang awtor ay mag-aaral ng B.A. Araling Pilipino sa UP Diliman. Kasapi ng Anakbayan at NEO-ANGONO Artists’ Collective.Binigkas ang tula sa unang poetry night, noong ika-15 ng Setyembre, sa Hacienda de Angono restaurant.
Inilathala ng Bulatlat
© 2006 Bulatlat ■ Alipato Media Center
Permission is granted to reprint or redistribute this article, provided its author/s and Bulatlat are properly credited and notified.