NI TERENCE KRISHNA LOPEZ
Inilathala ng Bulatlat
Vol. VII, No. 31, September 9-15, 2007

mananahan habang buhay
sa ating mga isipan
ang kanilang mga alaala
mga pangalan
mga mukha
mga mukhang walang pangalan
na ngayo’y hindi na natin mahagkan
masulyapan
o madampian man lamang ng ating mga kamay.

mga kaibigan
mga kapatid
asawa
anak
kasintahan
kasama

na gaya natin ngayo’y
sumigaw
bumulong
lumahok
lumaban
nagpumiglas

at tulad ng mga sa atin ay susunod
patuloy tayo
sa pagsigaw
paglahok
paglaban
pagpupumiglas

hanggang sa pagdating ng mga sandaling
mga sigaw at bulong nati’y
hangin na lamang ang makaririnig

patuloy pa rin
hanggang sa
ang ating kahapon at ngayon
tatagpi
sa bukas

at laya’y
ganap
hanggang wakas.

Inilathala ng Bulatlat

 Save as PDF