Ni Bienvenido Lumbera
Bulatlat.com
Noon nabosesan ka na namin.
Ngayon narito ka na naman para magsinungaling.
Binulgar ng Garci Tape ang iyong krimen —
Batas ng Diyos, batas ng tao dadapurakin,
Taong-gobyerno gagamitin,
Pondo ng bayan lulustayin,
Boto ni FPJ dadambungin,
Basta pagka-Pangulo tuloy-tuloy maangkin.
Dahil nabulgar na, ikaw mismo ang umamin,
Sa TV, nag-astang biktima, nagsori ang salarin.
Ay! pabalat-bungang paumanhin,
Binola-bolang pagsisinungaling,
Panis na pisbol kung baga ang hain
Sa bayang akala mo’y madaling linlangin.
Hanggang ngayon pinekeng totoo,
Inilalako pa rin, pero
Hindi mo na mabibilog ang aming ulo.
Pondo sa abono, pondo ng OFW,
Kurakot sa jueteng, pagbusal sa testigo,
Suhol sa konggresista, pati na sa obispo,
Pagkulong, pagpaslang sa tapat na tao,
Nakatalang lahat ang mga krimen mo.
Hayan, kinalawang tuloy ang bakal na sikmura mo,
Ang pagsisinungaling kasi may bagsik ng asido,
Kinakain ang bituka ng Pangulong
Pumipeke sa totoo.
Sa plasa, sa mall, sa mga barangay at baryo,
Pinagbabaga ang bayan ng mga kasinungalingan mo.
Isang araw, kasabay ng dilim at bagyo,
Sasabog na bulkan ang poot ng tao,
Kumukulong apoy at putik lalamon sa trono
Ng nagsasatukong pekeng Pangulo.
This poem was read at the mobilization of cause-oriented groups during the state of the nation address on July 24, 2006.
Inilathala ng Bulatlat
