NI CORAZON CAÑETE
Inilathala ng Bulatlat.com

In the Philippines, hunger reveals its face in the social survey of the Social Weather Station (SWS) for the third quarter of 2004. The survey shows that 15.1 percent of household heads reported that their families “had experienced hunger, without having anything to eat, at least once in the last (three) months.” Source: Bulatlat.com/.17-24 October 2004.

Hungkag ang sikmura,
nangangasim, sumisigaw ng pagkain.
Blangko ang kabuuan ng loob ng tiyan,
ni ang hangin sa loob ay lobong bundat,
naghahanap na madadampian ng
kahit na anong laman. Ngunit
kawalan.
Gutom ang taong nag-aari nito.
Ni laway na pang-tighaw sa nararamdaman,
ay di umaabot sa sikmurang dapat kalagyan,
kundi, ito ay dumampi hanggang lalamunan lamang.

Gutom, baybayin mo ang salita
at baka maibsan ang sakit ng iyong tiyan.
Lunukin mo ang bawat letra nito
kahit na ito’y lilimang piraso lamang,
at baka mapawi ang pagnanasa sa pagkain
ng tiyan mong nakabuyangyang.
Lituhin mo ang iyong sarili.
Lingunin mo ang lahat ng dumaraan,
ingusan mo ang ngumunguya,
duraan mo ang may tangan ng pagkain,
tadyakan mo ang mag-alok sa iyo
ng kahit na munggo o banana que,
o kahit ano.
Pagkat ikaw ay gutom,
at ang gutom ay puwedeng maging baliw,
o manigas at mamatay sa anumang sandali.

Ipadama mo sa lahat ang ibig sabihin ng gutom.
Ilantad mo ang epekto nito, hawaan mo ang lahat,
upang malaman nila ano ang ibig sabihin nang magutom,
nagugutom o simpleng gutom.
Oo, ipadama mo sa madla ang gutom.
Ipahawak mo ang halos tingting na braso ng iyong anak,
ang tuyot na balat, ang luwang mga mata,
ang labing nagtutuklap, ang buhok na naglalagas.
O ialay mo sa kanila ang bangkay mong asawa
na namatay nang kumakalam ang sikmura.
Nanigas ang tiyan, tumigil ang paghinga
sa pagkabigo na walang pagkain.
Pirasong tinapay ay itinira para sa bunso,
di nakaabot ng paghihintay sa susunod na
subo at huminto ang pagtibok ng puso.
Buong katawan ang bumigay sabay ng
pagbawi ng hininga sa tindi ng gutom.

Salamat.
Salamat ‘ka mo, kahit ikaw ay luhaan.
Salamat ‘ka mo at di na mararamdaman
ng asawa mo ang magutom.
Salamat ‘ka mo at ilang bibig na lang kayong
maghahati sa pirasong tinapay.
Salamat, paulit-ulit mong banggit.
Salamat,
at nabawasan ang nagugutom
dito sa ating bayan.

Inilathala ng (Bulatlat.com)

 Save as PDF