NI RAUL FUNILAS
Inilathala ng Bulatlat

Pag-aagawan ng liwanag at dilim
Na nagbabadya ng dapithapo’y
Gumagayak ang aking pagtatanod.

Sa atang na tungkuli’y mabubuhay ako’t mamamatay.
Wala akong hiling na handog, papuri o papugay,
Hindi ako tutugot hanggang sa paghimlay.

Ako ang tagapagmatyag sa kaligiran,
Ang lagablab laban sa kaligkig;
Ako ang tibanlos na kumakandong sa bukang-liwayway –
Ako ang balaraw ng takipsilim.

Ako ang kalasag na nagbabantay
At gumigising sa alimpungat ng tulog,
Ako ang tambuli
Sa kapakanan ng lahat.

Sa gabing ito at mga gabi pang daratal,
Ang dangal ko at buhay
Ay lipos kong iniaalay.

Sa Talulot ng Apoy at Sigid ng Lamig
Palmera Homes, QC

(Inilathala ng Bulatlat)

 Save as PDF