*alay sa mga mamamayan ng Barangay Corazon de Jesus sa ‘Dakilang Lungsod ng San Juan’ na puwersahang pinaalis sa kani-kanilang tahanan.
Demolis
‘Tinaboy nila kayo:
sa tahanan, ‘nilayo
para lang maitayo
Ni Guia ‘tong palasyo.
–Berlin P. Flores
Enero 28, 2011
Lungsod ng Mandaluyong
****
Oda sa Balite
Sa malalabay mong sanga
nagsasangandaan
ang mga pangamba
at alinlangan
ng bawat napapadaan.
Kung bakit ka kinatatakutan,
hindi ko lubos maunawaan.
Ang tanging alam ko lang–
nag-uugat sa ‘yong sanga-sangang mga ugat
ang mga alamat.
At,
sa balat mong tinungkab ng panahon
kasamang umaahon
ang mga tikbalang,
kapre,
duwende,
tiyanak,
white lady,
at iba pang nilalang daw ng kadiliman
na ipinananakot ng aming mga magulang
upang pangilagan naming maglaro sa ‘yong paanan
at damhin
ang kalayaang hatid
ng lumilipas
na kamusmusan.
–Berlin P. Flores
Enero 21, 2011
Lungsod ng Mandaluyong
Posted by 
