Ni RICHARD R. GAPPI
Bulatlat.com
Intoy, ipinagkaloob ng tatay
sa mga nasa evacuation center
ang iyong mga pinagliitan:
ang sapatos na unang sumapo sa iyong bigat
noong pinag-aaralang mamaybay at lumakad
ang mga bolang nagpatahan sa iyong iyak
at nagpatalbog sa puso ko ng iyong inosente,
malulutong na tawa at halakhak
ang mga damit na yumakap sa iyo
noong ikaw ay nilalamig
o pangporma kapag namamasyal sa mall
o bibisita sa iyong mga tito, tita, lolo’t lola.
Kung saan o kanino mang kamay
sila lumapag at dumapo,
Intoy,
para sa iyo ang unang kislap
ng mga ngiti at busilak nilang pasasalamat.
Tandaan mo, anak,
nang binyagan ka sa chapel sa Sagkahan
noong Bagong Taon ng 2010, malakas ang ulan.
Malakas ang ulan, walang humpay.
9:21AM, Biyernes, 10 August 2012
Angono Tres-Siete (3/7) Poetry Society
Angono, Rizal, Pilipinas