Por dios por santo naman,
Ano na ba’ng nangyayari sa ating bayan?
Ganito na lamang, ganire na lamang ang lamangan
Kahit saang departamento ng pamahalaan.
Ang sabi nila’y nangaglilingkod,
Por dios por santo! himig nakalulugod.(At nakasusulasok!)
Ang problema, lahat ng ahensiya… nangangungurakot…
Lahat yata e por dies porsiyento! Ang kapal ng mga apog.

Nakupo! Saan na papunta ang bayan ‘tang Filipinas?
Gahis na ang hiya ng mga ‘alanghiyang kumag.

Ano na ang sasabihin ng ating sisibol na lahi?
Papaano natin ipaliliwanag na tayo’y nagapi –
Oo, na di natin nakayang labanan ang mga budhi
Na ‘singkakapal ng pader doon sa Malakanyang na gusali?

Setyembre 12, 2006

Inilathala ng Bulatlat