Ni RICHARD GAPPI
Bulatlat.com
Winner talaga, lola ko’t Mareng Winnie
Na-sens ko sa Youtube ispits mo’t sinabi
Kaming mga gradweyt ng isteytyu at U.P.
Dapat daw may onor at exelens parati.
Dapat din daw na huwag maging sagabal
Sa daang tuwid at pag-unlad ng bayan
Dahil kung kami ay magiging pasaway
Hahantingin mo kami hanggang sa hukay.
Magtatanong lamang po kumareng ka-chat
Saan po ba kayo pumanig sa isyu ng E-VAT
Na sa amin ay dagdag pasakit at pahirap?
O nung tumiwalag itong grupong Hyatt
Dahil napansin nilang si Aling Gloria
Batbat na ng putik, dinuga ang balota?
Di ba’t si Kabayan ang pamalit sana
Pero sa korap ka pa rin nag-hosanna?
Tindig mong liberalisasyo’t free market
Hindi ba dulot sa baya’y nagkalintik-lintik?
Kung manggagawa’y taas sweldo ang giit
Chorva mo’y anik-anik ng ekonomiks?
Kung kami ay sumuway sa iyong lektsur
Kami ba’y anak-sa-labas ni Oblation?
Turo ni Oble: ano’ng takip ng dahon?
Magsuri’t magtanong, basagin ang kahon!
Hello, dinig nyo pa po ba ko Mareng Winnie?
O baka pang-unawa’y na-Hello Garci?
— Richard R. Gappi
1:29PM, Martes, 12 Oktubre 2010
Angono, Rizal, Pilipinas