ni RONALD TUMBAGA
Minamahal ang puno
Kasaysayan may turo,
Himagsikang binuo
May kapilas na puso.
* * *
May ilalim ng balag
Na manipis ang sinag.
Magsasaka, ilatag
Ang araw na di hungkag.
* * *
Mayro’ng talbos at mangga
Inirog na ni Pangga,
Anong panuklas pa ba?
Mundong gutom at nganga.
* * *
Mga daho’y paglaban
At kahit pa ubusan
Hindi ka matalusan
Muling mabubuhayan.
* * *
Pagkatapos ng unos
Ibubuhos ang tuos,
Malulubos ang kapos
Lalagasin ang lubos.
