NI RAUL FUNILAS
Inilathala ng Bulatlat
Vol. VII, No. 30, September 2-8, 2007

Lumalagaslas na talon sa parang ng laot
Ang kuluting along walang dalampasigang mayayapos.

Gahiblang buhok ang agwat sa buhol ng trapik
Ng sari-saring sasakyang hindi umiimik sa SLEX.

Dipang lumalakad nang paluhod ang matandang babaeng
Ang serbisyong dasal ay inarkila para sa imahen sa estante.

Pikit na nakakapoit ang bilanggo sa galising karsel
Na ang nagbabantay ay masahol pa sa Guardia Sibil.

Alumpihit at inaarikit sa sakit sa ospital
Ang pasyenteng walang kakayahang ang nagastos ay bayaran.

Samantalang nagpapatintero sa magarang palasyo
Ang mangungurakot sa kawawang gobyerno.

Agosto 29, 2007

Inilathala ng Bulatlat

 Save as PDF