NI TERENCE KRISHNA LOPEZ
Inilathala ng Bulatlat
Vol. VIII, No. 27, August 10-16, 2008
Tayo’y naging bahagi ng isang magdamag
Ng pananariwa sa mga alaala’t karanasan
Mga kalagayang hinahabi natin
Sa bawat araw nating pagkilos
Nagkape tayo at naghuntahan
Tungkol sa mga nagaganap at kung
Paano natin maibabahagi ang ating
Mga kakayaha’t kaalaman
Gaya halimbawa ng:
Pagpapatampok sa katotohanang
Inihahanda ng militarisasyon sa Guihulngan
Ang proyektong pagmimina ng mga dayuhan
Habang ang kalusugan ay pinalalala pa nitong
Pang-aabuso ng mga berdugo
Sa kanilang mga magsasaka, kababaihan, kabataan,
Mangagawang pangkalusugan sa komunidad
O kaya nama’y
Ang pangangailangan ng mas masiglang
Pagkilos na magbubunga ng mga tagumpay
Kagaya ng sa mga magsasakang
Sa kabila ng mga karahasan ay nakayang
Pagtagumpayan ang mga kampanyang
Mapataas ang sahod at ang presyo ng saging
Napag-usapan din natin
Ang ating mga pagkukulang
Sa mga kasama’t masang
Walang tigil ang pakikidigma sa uri
Lumipas ang gabi’t hindi natin
Hinayaan ang antok na pigilan
ang ating makabuluhang pagpapalitan ng mga pananaw,
At pagsusuri sa bawat tunggalian,
Muli tayong humigop ng kape
Sa palengkeng ilang saglit pa’y
Magsisimula muling
Magbubukas-pinto
Para sa kanilang lagi’t laging
Mas maaga pa sa pagsikat ng araw kung gumising
Upang makapaglako at lahat na:
Unti-unti silang dumaragsa
Tunggalian ng uri at digmang bayan
Ang ating paksa
[Kasunod ng mga kongkretong pangyayari
At kuwento ng pyudalismo, burukrata kapitalismo]
At pagsikat ng araw,
Sa ilalim ng bubungan ng dambuhalang kahon,
Sabay tayong lumuha sa iyong isinalaysay:
Nung nakaraang lunes
Tumula silang mga magulang, asawa, anak,
Kapatid at kaibigan
Nilang hanggang ngayon ay laman pa rin
Ng listahan ng mga nawawala.
Inilathala ng (Bulatlat.com)