NI VIJAE ALQUISOLA
Inilathala ng Bulatlat
Maaga mong natuklasan
Na kinakailangang itigil
Ang ikinabubuhay
Upang mas ganap na mabuhay.
Sa edad sampu, batid mo’ng
Nasa may
P
A
A
N
A
N
Ng lipunang hugis Mayon
Ang iyong talampakan,
Ang inyong talampakan.
Karugtong ng ABKD ng ‘yong dila
Ang MAKIBAKA!
Bahagi ng iyong kabataan
Ang “Boycott Nestle”
Sa tangan mong karatula.
At sa iyong pagtanda,
Babaunin mo ang mga aral ng welga.
Sa inyong pagtanda, hihibuan n’yo
Ng kulay ng protesta
Ang mga bakod ng pagsasamantala.
Dahil hindi mapakakalma
Ng mga pinatamis na patalastas
Ang kumukulong pait sa’yong bibig,
Sa inyong dibdib.
Bukas, bulkan kayong sasabog.
