Tulang Alay Kay Aguinaldo At Sa Mga Katulad Niyang Taksil Sa Bayan

Ni MARK JOSEPH RAFAL
Bulatlat.com

Anak ng bayan ang ang matandang babae sa bangketa
Anak ng bayan ang matandang lalaki sa Luneta
Anak ng bayan ang paslit sa gitna ng EDSA
Anak ng bayan ang binatang walang mahanap na trabaho
Anak ng bayan ang dalagang katawan ang pinagtrabaho
Anak ng bayan ang inang nagbebenta ng sanggol
Anak ng bayan ang amang nagnakaw ng tinapay
Anak ng bayan ang ateng nahinto sa pag-aaral
Anak ng bayan ang kuyang maagang naging ama
Anak ng bayan ang fastfood crew ng Jollibee at Mcdo
Anak ng bayan ang estudyanteng kapos sa matrikula
Anak ng bayan ang tambay sa kanto ng kawalan
Anak ng bayan ang kargador sa Divisoria at Baclaran
Anak ng bayan ang saleslady sa SM at Isetann
Anak ng bayan ang attendant sa Sogo at Victoria
Anak ng bayan ang titser sa Mababang Paaralan ng Kungsaan
Anak ng bayan ang engineer sa Qatar, Abu Dhabi at Lebanon
Anak ng bayan ang caregiver sa Canada at London
Anak ng bayan ang encoder sa maraming kompanya
Anak ng bayan ang call center agents sa Ortigas at Makati
Anak ng bayan ang tindera ng kwekkwek sa Teresa
Anak ng bayan ang saydgar boy sa suluk-sulok ng Maynila
Anak ng bayan ang street sweeper sa ilalim ng tanghaling araw
Anak ng bayan ang bantay ng Internet Shop at Pisonet
Anak ng bayan ang karpintero ng maraming subdivision
Anak ng bayan ang constructiom worker ng DMCI at SMDC
Anak ng bayan ang holdaper sa Recto at Avenida
Anak ng bayan ang matador sa palengke ng Balintawak
Anak ng bayan ang embalsamador ng Mabuhay Punerarya
Anak ng bayan ang mananahi ng damit sa Binondo
Anak ng bayan ang sapatero sa Marikina
Anak ng bayan ang hostess at GRO sa Malate
Anak ng bayan ang macho dancer sa Timog at Libis
Anak ng bayan ang pari sa liblib na mga kabundukan
Anak ng bayan ang magniniyog sa Kabikulan
Anak ng bayan ang sakada sa Tarlac at Negros
Anak ng bayan ang mangingisda sa lahat ng baybayin ng bansa
Anak ng bayan ang manggagawa sa lungsod at nayon
Anak ng bayan ang magsasakang wala at ninanakawan ng lupa
Anak ng bayan tayong lahat, ikaw at ako, at ang lahat ng nakauunawa
sa dusa at pasakit, galak at ligalig ng pagiging
Pilipino

at anak ng puta silang mga taksil sa diwa ng Himagsikan .

(https://www.bulatlat.com)

Share This Post

One Comment - Write a Comment

  1. Astig! 😀

Comments are closed.